Am Samschtig, 24. Juni 2023 isch e guetgluneti Reisegsellschaft mitem Hirsbrunner uf Reise.
Es isch d’Jodlerreis vo de Worber Jodler. Es geit i Schwarzwald – is chlyne Wiesental anes Summerfest.
Bim Rekognosziere im April hei mir Reiseverantwortliche zwöi jungi u ufgstellti Wirtslüt dörfe kenne lehre. D’Nicole u d’Janine hei mitti März dr Betrieb vo Gerhilde u Kurt übernoh. Sie sy motiviert däm Betrieb wieder nöis Läbe ds schänke u nume so gsprüeht vo Idee wie sie üsi Reis zu öppis bsungerem chönnte mache. Es Summerfescht söus gäh, sie wöue luege das Schwizer- u Schwarzwaldkultur enang begägne u d’Lüt chöi ungerhalte.
Sehr gärn hei mir däm Alass zuegstimmt u, ussert üsem Jodelgsang, o no öppis wöue derzu bytrage. Üsi Dirigäntin het churzerhand dr Wittwer Dänu u Salzmann Susle mit is Boot zoge damit die Drü mit lüfpiger Örgelimusig chöi ungerhaute. Gsanglich chönnte mir no chly ungerstützig bruche u hei drum paar Jodler vom Daheim Münsige agfragt üs ds begleite.
Dr 51er Car darf gfüllt wärde. Üser Partner sowie Fründe u Bekannti vom Jodlerklub hei nid müesse überredt wärde zum mitcho. Pünklich am 08.00h startet auso di grossi Schaar i richtig Schwarzwald.
Dr erst Halt isch ufem Blauen. Da dr Bärggasthof im Umbou isch u ersch am 11i d’Türe uf tuet u Gescht bewirtet, hei mir churzerhand sälber es Znüni mitgnoh. Kafi, Tee u wunderbari Züpfe hei mir chönne abiete.
Gsterkt sy mir zäme gstange u hei paar Lieder gsunge. Sogar ufem Ussichtsturm isch gjodlet worde. Trotz wunderbarer Tämperatur u Sunneschyn isch d’Fernsicht nid grad di beschti gsy, u glych hetme e wunderbari Ussicht dörfe gniesse. Di churzi Wyterfahrt dür dicht bewaldets Gebiet het üs zeigt warum dr Schwarzwald so heisst. A üsem eigentliche Ziel, Wirtschaft zum Waldhorn im chlyne Wiesental, sy mir härzlich willkomme gsy u speditiv es feins Mittagässe serviert übercho.
Dr Salat vorab het veiechli ds Brichte gäh, aber ds Rezäpt vo dr herrliche Salatsauce het weder d’Chöchi, d’Wirtin no di früecheri Bsitzere priis gäh, da het aus bättle nüt gnützt.
Ds Kafi hetme ufem Vorplatz gnoh wome no de Seniorehandörgeler het chönne zuelose bis mir du ändlich hei dörfe i d’Rundi stah u de doch rächt zahlryche Bsuecher vo däm Summerfescht eis singe. D’Ruth, d’Susle u dr Dänu heisech parat gmacht u afa örgele «was das Zeug hält». Di lüpfigi Örgelimusig het eim Iglade es Tänzli ds schwinge.
Abwächsligswys isch gjodlet u görgelet worde – mir gloube sehr zur Fröid vo vielne. Speter isch no e Alphorngruppe zuenis gstosse u hei das Summerfescht im Wiesental abgrundet.
Zwüschine hets Platz gha für mängs schöns u interessants Gspräch mit de Feschtbsuecher. Üses Gastgschänk, regionale Bärgchäs, hei mir ihne zum versueche abote u derby ou positivi Rückmäldige beträffend üsne schöne Trachte, üsem Gsang u dr Örgelimusig übercho.
Jodlerreis 2023
Durscht heimer o gha, d’Sunne het ufe Platz häre brönnt u me isch gäbig is schwitze cho. Ob es Mineral, es Radler, es Weissbier, oder…, ds fründliche, im folklorestyl kleidete Personal het aues gäh u üs verwöhnt. E grossi Nachfrag isch d’Schwarzwälderturte gsy, me het sich müesse spurte weme es Stück vo dere Spezialität het wöue ergattere. Aber ou süsch heisi feini Chüeche u angeri gluschtigi Sache im Agebot gha.
U de isches scho ume Zyt gsy für gäge Hei. Aui vom Waldhorn-Team sy üs persönlich cho verabschyde u danket füre Bsuech.
U de het üs Chauffeur Fredu ume sehr sicher nach Worb zueh gfüehrt – danke Fredu.
Mir gloube üses Ziel «zäme sy u e gmüetliche Tag ha» isch vollumfänglich erreicht worde.
Es paar Dankeschön wette mir a dere Stell no verteile:
Üsi Ruth, sie isch Dirigäntin, Jodlerin, Örgelifrou u gueti Seel im Allgemeine. Dr ganz Tag het sie chum es Pöiseli gha – Mersi vieu mau für aues!
Susle u Dänu, danke vieu mau für öie unentgältlich Isatz.
Dr Margrit Nachbur es grosses Mersi vieu mau für di glismete Jodler.
Danke de Münsiger-Jodler wo üs so
tatchräftig ungerstützt hei.
Danke aune Fründe u Bekannte wo dä Tag zumene unvergässliche Erläbnis gmacht hei. Fotos vor Jodlerreis
Ursula, Andreas u Vreni